2026 йилнинг январь-апрель ойларида Кадастр агентлиги ҳамда Давлат кадастрлари палатаси Сирдарё вилояти бошқармаларида коррупцияга қарши кураш бўйича кенг қамровли чора-тадбирлар амалга оширилди. Ушбу даврда олиб борилган ишлар нафақат ходимлар ўртасида, балки кенг жамоатчилик ўртасида ҳам коррупцияга нисбатан муросасиз муносабатни шакллантиришга хизмат қилди.

Мамлакатимизда коррупцияга қарши кураш давлат сиёсатининг устувор йўналишларидан бирига айланган бугунги кунда ҳар бир идора, ҳар бир ходим бу борадаги масъулиятни чуқур ҳис этиши зарур. Сирдарё вилояти кадастр бошқармалари ҳам ушбу масъулиятни тўлиқ англаб, йил бошидан буён тизимли ва изчил иш олиб бормоқда.

Ҳисобот даври якунларига кўра, жами 86 марта коррупцияга қарши йўналтирилган тарғибот-ташвиқот ишлари амалга оширилди. Бу рақамнинг ўзи тарғибот ишларининг қанчалик жадал ва узлуксиз олиб борилганидан далолат беради. Ушбу тадбирларнинг 45 таси веб-сайт ва электрон ахборот воситаларида, 1 таси радио эфирида, 1 таси эса матбуот саҳифаларида ўз аксини топди. Қолган 41 тадбирда эса оғзаки ҳуқуқий тарғибот усулидан фойдаланилди — 26 марта давра суҳбатлари, 12 марта маърузалар ва 3 марта уйма-уй юриб ўтказилган тарғиботлар ташкил этилди.

Манзилли тарғибот-ташвиқот ишлари нафақат идора ичида, балки жамоатчилик ҳаётининг турли соҳаларини қамраб олди. Тадбирларнинг 2 таси маҳаллаларда, 36 таси меҳнат жамоаларида, 3 таси эса бошқа жойларда ўтказилди. Жами 486 нафар тинглувчи бу тадбирларда иштирок этиб, коррупциянинг моҳияти, оқибатлари ва унга қарши курашиш йўллари ҳақида батафсил маълумот олди. Бундан ташқари, 16 нафар ходим билан якка тартибда профилактика ишлари ҳам олиб борилди.

Тарғибот ишларини янада самарали ташкил этиш мақсадида муҳим амалий қарор қабул қилинди — вилоятнинг барча шаҳар-туман бўлим ва филиалларида ҳар ҳафта душанба куни ўтказиладиган режавий йиғилишларнинг ажралмас қисмига коррупцияга қарши тушунтириш ва профилактика тадбирлари киритилди. Бу ёндашув ходимларда тўғри касбий муносабатни мустаҳкамлашда муҳим омил бўлиб хизмат қилмоқда.

2026 йил 20 февраль куни эса Сирдарё ёшлари радиосининг «ФМ-Мулоқот» эшиттиришида бошқарманинг коррупцияга қарши кураш бўлими бош мутахассислари иштирокида кенг жамоатчилик учун мўлжалланган жонли суҳбат ташкил этилди. Унда коррупцияга қарши ички назорат тушунчаси ва унинг моҳияти, комплайнс-назоратнинг шакл ва турлари, соҳада бу борада амалга оширилаётган ишлар ҳақида батафсил маълумотлар берилди. Радио эшиттириши орқали тарғибот ишларини кенг омма орасида тарқатиш — бу анъанани келажакда ҳам давом эттириш режалаштирилмоқда.

Амалий чоралар сифатида эса барча бўлим ва филиалларда "Порахўрлик ва коррупциянинг салбий оқибатларини" ўзида акс эттирган эслатма буклетлар тайёрланиб, ҳар бир ходимнинг иш столига қўйилди. Ушбу оддий, аммо таъсирчан усул ходимларнинг кундалик иш фаолиятида тўғри қарорлар қабул қилишида қўшимча маънавий таянч бўлиб хизмат қилмоқда.

Қонунчилик асосини мустаҳкамлаш борасида ҳам жиддий ишлар амалга оширилди. Ходимларга Ўзбекистон Республикаси Президентининг "Коррупцияга қарши курашиш тизимини янада такомиллаштириш бўйича белгиланган устувор вазифалар ижросини самарали ташкил этишга доир чора-тадбирлар тўғрисида"ги ПФ-71-сон Фармони (21.04.2025-yil) ҳамда "Давлат органлари ва ташкилотларининг коррупцияга қарши ички назорат бўлинмалари мустақиллигини таъминлаш ҳамда фаолият самарадорлигини ошириш чора-тадбирлари тўғрисида"ги ПҚ-147-сон Қарори (21.04.2025-yil) нинг мазмун-моҳияти батафсил тушунтирилди. Бундан ташқари, Кадастр агентлиги директорининг 392-19-сон буйруғи (10.12.2025-yil) ва 73-19-сон буйруғи (18.03.2026-yil) ҳам ходимларга тўлиқ етказилди. Ушбу ҳужжатлар нафақат тажрибали ходимлар, балки янги ишга қабул қилинганлар томонидан ҳам чуқур ўрганилди.

73-19-сон буйруқ ижросини таъминлаш мақсадида бошқармаларда масъул ходимлар иштирокида махсус ишчи гуруҳ ташкил этилди. Гуруҳнинг асосий вазифаси — коррупцияга қарши тадбирларни мувофиқлаштириш, ўтказилган мониторинг таҳлиллари асосида соҳа қонунчилигини такомиллаштириш бўйича таклифлар ишлаб чиқиш ҳамда хизмат фаолиятини автоматлаштиришга доир янги ечимлар тақдим этишдан иборат. Бу гуруҳ, моҳиятан, тизимда коррупция учун ҳар қандай бўшлиқни бартараф этишга қаратилган доимий механизм сифатида фаолият юритмоқда.

Ҳисобот даври якунида барча ходимлар "Манфаатлар тўқнашуви тўғрисида" декларация тўлдирди. Амалга оширилган текширув натижалари кўрсатдики, ушбу даврда манфаатлар тўқнашуви ҳолатлари аниқланмади. Ишга қабул қилиш жараёнида эса янги ходимлар билан коррупцияга қарши курашиш бўйича келишувлар имзоланди. Бу амалиёт ходимнинг давлат ва жамият олдидаги масъулиятини янада аниқ белгилаб бермоқда.

Олиб борилган барча ишлар Сирдарё вилоятида коррупциянинг олдини олиш бўйича "Йўл харитаси" доирасида амалга оширилди. Ушбу жараёнда вилоятнинг ҳуқуқ-тартибот идоралари ва тегишли ташкилотлар билан самарали ҳамкорлик йўлга қўйилганлиги алоҳида таъкидланади. Коррупцияга қарши кураш — бу биргина идоранинг эмас, бутун жамиятнинг умумий иши эканлиги бу ҳамкорликда яққол намоён бўлмоқда.

Азиз фуқаролар, бу мурожаат сиз учун!

Ҳаётда шундай вазиятлар бўлади — ҳужжат тезроқ чиқишини хоҳлайсиз, навбатда узоқ кутишни истамасангиз ёки ишингиз иложи борича тез ҳал бўлишини орзу қиласиз. Бу — инсоний туйғу, буни тушуниш мумкин.

Аммо шу лаҳзада ходимга пора таклиф қилиш — бу йўл туюлиши мумкин, лекин у аслида энг хавфли йўлдир.

Пора — бу бир лаҳзалик енгиллик, аммо узоқ муддатли зарар. Биласизми, пора таклиф қилган фуқаро ҳам қонун олдида жавобгар бўлади? Ўзбекистон Республикаси Жиноят кодексига кўра, пора бериш ҳам, пора олиш ҳам — жиноий жавобгарликни келтириб чиқаради. Яъни "мен фақат тезлаштирмоқчи эдим" деган узр қонун олдида асос бўлмайди.

Энг муҳими — бунга ҳожат йўқ! Кадастр хизматлари белгиланган муддатларда, ҳеч қандай қўшимча тўловсиз кўрсатилиши шарт. Бу сизнинг қонуний ҳуқуқингиз. Агар ходим ишингизни атайлаб кечиктирса, асоссиз рад этса ёки бирор нарса талаб қилса — бу унинг қонунни бузишидир, сизнинг эмас.

Шу сабабли фуқаролардан илтимос:

Ходимга пора таклиф қилманг — уни жиноятга ундаманг. Сизнинг таклифингиз уни жиноятга ундаши мумкин ва иккалангизни ҳам қонун олдида жавобгар қилиши мумкин. Агар хизмат кўрсатишда муаммо бўлса —қонуний йўлдан боринг: кадастр хизматларидан фойдаланиш жараёнида сизга тезлаштириб беришни ёки бошқа бир хизматларни қилиб беришини айтиб пора таклиф қилса Кадастр агентлигининг 1097 рақамли ишонч телефони орқали ёки ҳуқуқни муҳофаза қилиш органларига мурожаат қилишлари мумкин. Ҳар қандай муаммо қонуний йўл билан ҳал этилиши кафолатланади.

Давлат кадастрлари палатаси Сирдарё вилоят бошқармаси томонидан вилоятдаги 350 минг 981 гектар ер майдонининг электрон харитаси яратилди. Шунингдек 340 минг 820 гектар ер майдони давлат рўйхатидан ўтказилиши таъминланди.

Ҳозирги кунда фуқароларимизнинг кўчмас мулкка бўлган талаби кун сайин ортмоқда. Биргина жисмоний ва юридик шахслар эгалигида бўлган кўчмас мулклар сони йил бошида 216 246 тани ташкил қилган бўлса, 2026 йилнинг 1 январь ҳолатига ушбу кўрсатгичлар 229 367 тани ташкил қилган, яъни 13 121 тага ушбу кўрсатгичлар ошмоқда.

Кўчмас мулкларга кадастр паспортларини шакллантириш:

юзасидан 2025 йилнинг давомида Давлат кадастрлари палатаси Сирдарё вилояти бошқармасининг туман, шаҳар филиалларига Давлат хизматлари марказлари ёки Ягона интерактив давлат хизматлари портали (my.gov.uz сайти) орқали кадастр паспортини тайёрлаш юзасидан 38 253 та мурожаатлар келиб тушди.

Мазкур мурожаатлар асосида 19 827 та жисмоний ва юридик шахсларга тегишли бўлган ер участкалари ва кўчмас мулкларига кадастр паспортлари тайёрланиб, давлат хизматлари марказлари орқали мулкдорларга тақдим этилди. 372 аризалар тўлов жараёнида бўлса 1516 та аризаларда муддати бўлганлиги сабабли кадастр паспортини шакллантириш жаройинида.

Кўчмас мулкка бўлган ҳуқуқларни давлат рўйхатидан ўтказиш:

2025 йил давомида вилоятдаги 39 336 та кўчмас мулкка бўлган ҳуқуқлар давлат рўйхатидан ўтказилди ва вилоятда жами 215 554 та объектлар давлат рўйхатидан ўтказилишига эрилшилди.

Маълумот учун, тегишли ҳуқуқ пайдо бўлгандан кейин 1 ой ичида кўчмас мулкка оид ҳуқуқлар давлат рўйхатидан ўтказилиши керак.

Кадастр агентлигининг Сирдарё вилоят бошқармаси томонидан 2025 йил давомида Кадастр агентлиги Сирдарё вилоят бошқармасининг туман ва шаҳар бўлимлари томонидан ўтказилган ер ва кадастр назорати соҳасида 2 294 та жисмоний ва юридик шахслар томонидан 380,2 гектар ер майдонларини ўзбошимчалик билан эгаллаб олиш ҳолатлари аниқланган,

Шундан:

🟣47 та холатда 276,3 гектар қишлоқ хўжалигига мўлжалланган ерлар,

🟣2 073 та ҳолатда 25,1 гектар аҳола пунклари ерларидан, 138 та ҳолатда 23 гектар саноат, транспорт, алоқа, мудофаа ерларидан,

🟣25 та ҳолатда 0,2 гектар сув фонди ерларидан

🟣17 та ҳолатда 55,6 гектар захира ер майдонлардан ташкил этади.

Аниқланган қонунбузилиш ҳолатлари юзасидан 2 294 та жисмоний ва юридик шахсларга ер майдонларини ўзбошимчалик билан эгаллаб олиш, ноқонуний қурилишларни бартараф этиш бўйича огоҳлантиришлар берилган, Огоҳлантириш натижасида 1798 та ҳолатда жисмоний шахслар томонидан 71,8 гектар томорқа сифатида фойдаланган ер майдонлари ва ноқонуний қурилган иморатлар ихтиёроий равишда ўз ҳисобидан бартараф этилиши таъминланди.

Ер — энг катта бойлигимиз

Ҳаммамиз биламиз: ер бўлмаса, нон ҳам бўлмайди. Шу боис давлатимиз раҳбари ердан унумли фойдаланиш, уни асраш ва бўш қолиб кетишига йўл қўймасликни асосий вазифа қилиб қўйди.

Бугунги кунда баъзи ҳудудларда қишлоқ хўжалигига мўлжалланган ерларнинг бир қисми бекор ётиб қолаётгани сир эмас. Энди бу масалага қатъий тартиб жорий этилди: бўш қолган ерлар давлат кадастрида қайд қилинади ва қисқа муддатда аукционга чиқарилади.

Бўш ерлар бекор қолмайди. Ҳокимликлар мавжуд бўш ерларни 10 кун муддатда давлат ер кадастрида қайд этилади ва яна 10 кун ичида электрон аукцион савдоларига чиқарилади.

Аукциондан тушган пул суғориш тизимларини яхшилаш, янги технологиялар жорий этиш ва аграр инфратузилмани ривожлантиришга сарфланади.

Шунингдек ерлар фақат ижарага берилади. Қишлоқ хўжалиги ерлари «эгалик» қилинмайди, фақат узоқ муддатли ижара асосида берилади. Ўзбекистон фуқаролари учун — 30 йил, хорижий инвесторлар учун — 25 йил. Қолаверса ерларни қайта ижарага бериш тартиби ҳам жорий этилди. Эндиликда фермер ўзи ишлата олмайдиган ерини қонуний равишда бошқаларга ижарага бера олади.

Ер — бу бизнинг нонимиз, тирикчилигимиз. Эндиликда ушбу янги фармони орқали бу бебаҳо бойликка нисбатан янада адолатли ва оқилона муносабат ўрнатилади. Энди ҳар бир қарич ер ўз эгасига эга бўлиб, халқ манфаатига хизмат қилади.

“Ерни асрайлик, ерни эъзозлайлик — нонимиз мўл, дастурхонимиз тўкин бўлади!”

Давлат кадастрлари палатаси Сирдарё вилоят бошқармаси шўба бошлиғи B.Sultonov

Агар Сизнинг ер-мулк ҳуқуқларингизга оид масалаларингиз, кадастр ҳужжатларини расмийлаштириш, кўчмас мулкка бўлган ҳуқуқларингиз давлат рўйхатидан ўтказиш ёки бошқа кадастр хизматлари билан боғлиқ қонуний ишларингиз белгиланган муддатда ҳал этилмаса, бюрократик тўсиқлар ёки асоссиз сарсонгарчилик ҳолатларига дуч келсангиз, шунингдек Сизнинг мурожаатларингиз эътиборсиз қолган бўлса — бу каби ҳолатлардан хабардор бўлиш ва уларни бартараф этиш биз учун муҳим ҳисобланади.

Шу муносабат билан Сиздан илтимос қиламизки, кадастр соҳасидаги муаммоларингиз юзасидан, шунингдек, бирор бир кадастр ходимининг ноқонуний ишлари тўғрисида хабар топсангиз бевосита Давлат кадастрлари палатаси Сирдарё вилоят бошқармасининг (67) 236-50-05 ишонч телефонига ёки Менинг шахсий рақамимга (90) 515-06-88 мурожаат қилинг.

Сизнинг ҳар бир мурожаатингиз биз учун муҳим!

Адолатли, шаффоф ва қонуний хизмат кўрсатиш – бизнинг устувор вазифамиздир.

Ҳурмат билан Давлат кадастрлари палатаси

Сирдарё вилоят бошқармаси бошлиғи

Равшан Нишанов

Кадастр соҳасида "2024 йил давомида ер ва кадастр назорати бўйича амалга оширилган ишлар ҳамда Ўзбекистон Республикасининг 937-сонли Қонуни ижроси"га бағишланган матбуот анжумани бўлиб ўтди. Тадбирда кадастр хизмати кўрсатишни яхшилаш, соҳани рақамлаштириш, шаффофлигини таъминлаш, умумиллий бойлигимиз бўлган ерни асраб-авайлаш ва ундан оқилона фойдаланиш борасидаги ишлар юзасидан масъулларнинг маърузалари тингланди.

Матбуот анжуманида барча босма ва электрон ОАВ вакиллари, журналистлар, ижтимоий тармоқ фаоллари, блогерлар, маҳаллий давлат ҳокимияти органлари ва ташкилот ва муассасалар ахборот хизматлари раҳбарларига амалга оширилган ишлар юзасидан маълумотлар берилди.

Қадрли юртдошлар!

Ер, мулк, уй-жой билан боғлиқ муносабатлар тарихан қадриятимизга айланган. 2024 йилнинг 5 август санасида Давлатимиз раҳбари ватандошларимиз учун муҳим бўлган яна бир тарихий Қонунни (https://lex.uz/docs/7049383) имзоладилар.

Бугун 8 ноябрдан миллионлаб юртдошларимиз кутган “Ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш тўғрисида”ги қонун кучга киради. 2024–2025 йиллар учун тасдиқланган режа-гарфик (https://kadastr.uz/uz/etirof-etish-reja-jadvali) асосида маҳаллаларда кадастр ходимлари томонидан хатлов ишлари бошланади.

Қонун кучга кириш санасида сизга мурожаат қилишимдан мақсад «огоҳликка» чақиришдир!

Узоқ йиллар давомида ўзи яшаб келаётган уйини расмийлаштириб олишни ният қилиб юрган ҳалол инсонлар кўп аммо, вазиятдан фойдаланиб, ноқонуний йўллар билан даромад қилишни режа қилиб юрган «уддабуронлар» ҳам йўқ эмас.

Сизларни бундай нопок кимсаларнинг ҳар қандай сўзлари ва ваъдаларига ишонмасликка чақираман!

Биринчидан, маҳаллалар аниқ тасдиқланган режа-график (https://kadastr.uz/uz/etirof-etish-reja-jadvali) асосида хатловдан ўтказилади. Бири қолиб иккинчисига ўтилмайди, яъни халқ тили билан айтганда “тезлаштириб беришнинг имкони йўқ!”.

Иккинчидан, хатловдан кейин «ЭЪТИРОФ» дастурига (https://etirof.kadastr.uz/) киритилган ҳар бир ҳолат бўйича 15 дан ортиқ вазирлик ва идоралар хулосаларини беради ҳамда космик суратлар ёрдамида таҳлил қилинади. Халқ тили билан айтганда “иложини қилиб ўтказиб бўлмайди!”.

Учинчидан, хатлов жараёнида қонун билан аниқ белгилаб берилган 8 та тоифага (https://www.youtube.com/watch?v=SBqCxmIctlE&list=PLVmgu-d9jSysRYspmdRuj1BYWlKMNiz2D) кирувчи ҳолатлар ўрганилади. Ҳозирда эгаллаб олиб, қурилиш қилиб қонунийлаштириб олишни режа қилаётганлар жавобгарликка тортилади ва бу ишлар ҳам ахборот тизимлари орқали назорат қилинади. Халқ тили билан айтганда “таниш-билиш ўтмайди!”.

‼️Ҳурматли юртдошлар, ҳар қандай ҳолатда ҳам фирибгарлик, таъмагирлик ёки коррупция ҳолатларига дуч келсангиз ҳуқуқни муҳофаза қилиш органларига хабар беринг.

Мазкур Қонуннинг адолатли ва самарали ижро этилиши барчамизга бирдек боғлиқ эканлигини ёддан чиқармайлик.

Ҳурмат билан,

Кадастр агентлиги директори

Фаррух Пулатов.

Сирдарё вилоятида жами 239 та маҳалла ва 6588 та кўчалар мавжуд. Шундан 60 та шох кўча, 763 та тор кўча, 930 та берк кўча, 4 862 та кўчалар давлат реестридан ўтказилган.

📊 Энг кўп маҳаллалар бўйича етакчи туман, шаҳарлар

Боёвут тумани 39 та

Сирдарё тумани 38 та

Ховос туманид 28 та

Энг кам маҳаллар Ширин шаҳрида 7 та

📊Энг кўп кўчалар бўйича етакчи туман, шаҳарлар

Боёвут тумани 1 275 та

Сирдарё тумани 933 та

Сайхунобод тумани 786 та

Энг кам кўчалар Ширин шаҳрида 116 та

Маълумот ўрнида Давлат кадастрлари палатаси Сирдарё вилояти бошқармаси томонидан вилоятимиздаги бинолар, иншоотлар, манзилларни рақамлаштириш яъни Давлат реестрига киритилиши баробарида кўчаларнинг ҳам ҳисоби юритилади.

Шунингдек мурожаатларнинг 6 минг 302 та аризаларда камчиликлар мавжудлиги сабабли рад этилган ва 210 тасида аризачилар томонидан кадастр паспорти учун давлат божи тўлов жараёнида бўлса, қолган 434 аризалар кўриб чиқилмоқда.

Энг кўп кадастр паспортлари расмийлаштириш туман, шаҳар кесимида кўрайдиган бўлсак энг юқори кўрсаткич вилоятнинг Гулистон шаҳрига 1 656 та, Сирдарё туманига 1 091 та, Боёвут туманига 1 001 та ҳисобига тўғри келмоқда.

Кадастр паспортини расмийлаштириш учун келиб тушган аризалар қандай ҳолларда рад этилади ?

Кадастр паспорти учун келиб тушган аризалар қуйидаги ҳолларда рад этилади. Жумладан “Кадастр паспортини шакллантириш учун сўровномада нотўғри маълумотларни кўрсатилганлиги, кўчмас мулк объектларига бўлган ҳуқуқларни тасдиқловчи ҳужжатлар мавжуд эмаслиги, ариза берувчи ёки унинг вакили келишилган манзилда бўлмагани, ваколатли орган томонидан кадастр паспортини расмийлаштириш бўйича кўчмас мулк объектига тақиқ ёки хатлов қўйилгани сабабли бино-иншоотларга кадастр паспорти рад этилади.

Кадастр паспорти нечи кунда расмийлаштириб берилади ?

Кадастр паспортини расмийлаштириш муддатига келадиган бўлсак Кўчмас мулк объектларининг турар-жой фондига оид қисмига Кўп квартирали уйдаги квартираларга 3 иш куни мобайнида, Якка тартибдаги турар жойларга 5 иш куни мобайнида расмийлаштириб берилади ҳамда Кўчмас мулк объектларининг нотурар бино ва иншоотларга оид қисмига Умумий майдонидан келиб чиқиб 5 иш кунидан 25 иш куни мобойнида кадастр паспорти расмийлаштириб берилади.

Кадастр паспорти қандай ҳужжат ?

Кадастр паспорти – кўчмас мулк объекти тўғрисидаги умумий маълумотлар ва объектнинг кадастр рақамини ўз ичига олган электрон ҳужжат ҳисобланди. Шунингдек Кадастр паспорти Вазирлар Маҳкамасининг 2020 йил 2 сентябрдаги 535-сонли қарорида асосида шакллантирилади.

Сирдарё вилоятида нечта кўчмас мулк объектлари мавжуд ?

Бугунги кунда Сирдарё вилояти жами 213 896 кўчмас мулклар мавжуд бўлиб шундан 151 555 таси якка тартибда турар жойлар, 39 047 таси кўп қаватли уйлардаги квартиралар, 16 369 таси нотурар объектлар ҳамда 6 925 таси бўш ер майдонларини ташкил этади дейди Давлат кадастрлари палатаси Сирдарё вилояти бошқармаси бошлиғи Раджабов Бекзод.