Ўзбекистон Ёшлар иттифоқи Сирдарё вилояти Кенгаши томонидан Сирдарё тумани сафарбарлик чақирув резерви батальонида “Ватан учун, Миллат учун, Халқ учун” шиори остида “Ҳарбийликка тайёргарлик” номли лойиҳага асосланган катта тадбир ўтказилди. Тадбир ёшларни ҳарбий-ватанпарварлик руҳида тарбиялаш, уларни касб-ҳунарга ўқитиш ва малакали, масъулиятли кадрлар қилиб етиштириш мақсадида ташкил этилди.

Мазкур лойиҳа айниқса Сирдарё тумани ҳудудида алоҳида ишлаш талаб этиладиган, ижтимоий жиҳатдан уюшмаган ёшларни жалб қилишга қаратилган бўлиб, уларнинг жамиятда ўз ўрнини топишлари, ҳарбий ва маънавий баркамол бўлиб етишишларига кўмаклашди.

Тадбир дастлаб “Хотира майдони”дан бошланди. Бу ерда хизмат бурчини бажариш вақтида ҳалок бўлган ҳарбий хизматчиларнинг, шунингдек, ватанимиз тинчлиги ва равнақи учун жонини фидо қилган қаҳрамонларнинг хотираси юксак ҳурмат билан ёд этилди. Ёшлар қабрлар олдида турганида, бу воқеалар уларда ўз ватанига, унинг ҳимоясига бўлган масъулият туйғусини янада кучайтирди.

Тадбир давомида ҳарбий қисм ҳудудида бир нечта ўқув нуқталари ташкил этилди. Бу нуқталарда ёшлар ҳарбий билим ва кўникмаларни эгаллашга, замонавий ҳарбий техника ва жиҳозлар билан танишишга имкон топди. Шунингдек, ёшлар учун «Заковат» интеллектуал ўйини ташкил этилиб, ҳарбий маълумотлар, тарихий воқеалар ва ватанпарварлик мавзусида саволлар орқали билимлари синовдан ўтказилди. Бу ўйин ёшлар ўртасида катта қизиқиш уйғотиб, уларда интеллектуал салоҳиятни ривожлантиришга хизмат қилди.

Ҳарбий қисмда бўлган ёшлар ўзларини ҳақиқий ҳарбий хизматчилар каби ҳис қилишди, бу эса уларнинг ҳарбий хизматга бўлган қизиқишини оширди. Улар учун ташкил этилган амалий машғулотлар, қурол-аслаҳа билан танишиш ва жамоавий фаолият уларнинг жисмоний тайёргарлик даражасини оширди, шу билан бирга улар ўзаро ҳамжиҳатлик ва интизомни мустаҳкамлашди.

Мустаққиллигимизнинг 34 йиллиги муносабати билан Ўзбекистон Ёшлар иттифоқи Сирдарё вилояти Кенгаши, Гулистон ҳарбий прокуратураси, Тошкент ҳарбий округи қўмондони ўринбосари ҳамда Мудофаа ишлари бошқармаси Жамоатчилик Кенгаши раиси ҳамкорлигида “Ватанпарварлик ва фуқаролик масъулиятини ошириш” мавзусида “Раҳбар ва ёшлар” учрашуви ўтказилди. Тадбирда Сирдарё тумани ёшлари ва ёш ҳарбий хизматчилар иштирок этди.

Учрашув давомида ёшлар ўзларини қизиқтирган саволларга батафсил жавоблар олишди, ўзаро фикр алмашилди. Тадбир мақсади ёшларни она юртга муҳаббат ва садоқат руҳида тарбиялаш, фарзандлик бурчини юксак масъулият билан бажариш ҳамда кенг дунёқарашли, мустақил фикр юритадиган баркамол шахс сифатида шакллантиришдир. Шунингдек, ёшлар ўртасида жиноятчиликни олдини олишга алоҳида эътибор қаратилди.

Тадбир якунида иштирокчилар ўз фикр-мулоҳазаларини билдириб, бундай лойиҳалар ёшларнинг ҳаётида ижобий ўзгаришлар қилишда ва уларнинг фуқаролик позициясини мустаҳкамлашда катта аҳамиятга эга эканини таъкидлади.

“Ватан учун, Миллат учун, Халқ учун” лойиҳаси ва унга бириктирилган “Ҳарбийликка тайёргарлик” дастури ёшларни ҳарбий ва маънавий жиҳатдан тайёрлашда муҳим омил бўлиб хизмат қилмоқда. Бу каби тадбирлар келажакда мустақил Ўзбекистон мудофаасини мустаҳкамлаш ва баркамол ёш авлодни тарбиялашда катта ҳисса қўшади.

ОАВ мухбири
Ганиев А

Мамлакатимизда ёшларга оид давлат сиёсатининг устувор йўналишларидан бири – уларни ҳар томонлама соғлом, маънавий етук, жисмонан чиниққан ва ҳарбий-ватанпарварлик руҳида тарбиялаш, иқтидор ва салоҳиятини рўёбга чиқариш учун зарур шарт-шароитлар яратишга қаратилган.

Айнан шу мақсадни ўзида мужассам этган ҳолда, “Долзарб 90 кун” лойиҳаси доирасида Ўзбекистон Ёшлар иттифоқи Сирдарё вилоят Кенгаши томонидан навбатдаги муҳим ташаббус амалга оширилди. Сирдарё туманида жойлашган ҳарбий қисмда “Буюк эл фарзанди” шиори остида “Эр йигитнинг, эр йигитга айтган гапи таъсирли бўлади” мавзусида ёшлар билан учрашув ташкил этилди.

Мазкур учрашувда ёш ҳарбий хизматчилар, туман ёшлари, спорт соҳасида ютуқларга эришган ҳарбий хизматчилар, шунингдек, Ўзбекистон Мудофаа вазирлиги спорт усталари фаол иштирок этдилар.

Тадбирнинг асосий мақсади – ёшларнинг бўш вақтини мазмунли ўтказиш, уларни соғлом турмуш тарзига йўналтириш, спортга қизиқишини ошириш, ёш иқтидорларни кашф этиш, шунингдек, ҳарбий-ватанпарварлик руҳини мустаҳкамлашдан иборат бўлди.

Учрашув мулоқот ва очиқ суҳбат тарзида ташкил этилди. Тадбир давомида ҳарбий спорт усталари ўз ҳаётий тажрибалари, спортдаги эришган ютуқлари билан ўртоқлашдилар. Улар ёшларни фаол бўлишга, мақсад сари қатъият билан ҳаракат қилишга ундадилар. Иштирокчилар учун яратилаётган имкониятлар, спорт иншоотлари, тўгараклар ва давлат дастурлари тўғрисида ҳам батафсил маълумотлар берилди.

Ёшлар ўзларини қизиқтирган саволлар билан мурожаат қилиб, соҳа мутахассислари томонидан кенг ва асосли жавоблар олишди. Мулоқот давомида иштирокчиларнинг мотивацияси, юртга бўлган садоқати, соғлом турмуш тарзига бўлган қизиқиши янада ортгани сезилди.

Шу ўринда алоҳида таъкидлаш лозимки, бу каби амалий учрашувлар ёш авлодда Ватанга садоқат, фидойилик, жисмоний ва маънавий соғломлик тамойилларини мустаҳкамлашда, улар орасидан келажак лидерларини тарбиялашда муҳим ўрин тутади.

Тадбир якунида иштирокчилар томонидан билдирилган фикр ва таклифлар асосида келгусида бундай учрашувларни вилоятнинг бошқа ҳудудларида ҳам ташкил этиш режалаштирилмоқда.

Зеро, Ватан келажаги – бугунги ёшларнинг қўлида. Уларнинг онгли, интилувчан ва ватанпарвар бўлиб улғайиши учун жамиятнинг барча бўғинлари ҳамжиҳатликда ҳаракат қилиши зарур. Шундай бир пайтда ёшлар билан мунтазам мулоқотлар ўтказиш, уларни ўйлантираётган масалаларга ечим топишга кўмаклашиш ҳар биримизнинг фуқаролик бурчимиздир.

ОАВ мухбири
Ганиев А